यस्तो रहेछ फरक : भारतीय र चिनियाँ हेलिकप्टरको काम गराइमा

भूकम्पको राहतका लागि आएको भारतीय मिडिया र हेलिकप्टरले दिएको दुःखको बारेमा दिनहुँ नयाँनयाँ तथ्यहरु बाहिर आइरहेको छ ।

भारतीय हेलिकप्टरहरुले ‘फिल्ड कमान्ड’ गरिरहेका नेपाली सेनाका अधिकारीहरुको निर्देशन नमानेपछि सेनाकै अनुरोधमा सरकारले उसको लागि ‘तेल नदिने’ निर्णय गरेको छ । तर पनि उसको काम गर्ने शैली सुध्रिएको छैन ।

भारतीयहरुले फिल्डमा खटिने नेपाली सेनाका अधिकारीहरुको निर्देशन पालना नगरी ‘माथिको आदेश मात्र मान्ने’ बताउने गर्छन् । यसैकारण सेनाका कामान्डरहरुले आफ्नो माथिल्लो निकायमा ‘तत्काल भारतीय हेलिकप्टर फर्काउन’ सिफारिस गरेका थिए । स्रोतका अनुसार कार्यक्षेमा खटिने कमान्डरहरुको यति गम्भीर सिफारिस आएपछि नेपाली सेनाको ‘पीएसओ’ बैठक बसेर पहिले भारतीय पाइलटहरुलाई काम गर्ने शैली परिवर्तन गर्न अनुरोध गर्ने निर्णय गर्‍यो ।

सिन्धुपाल्चोकमा बतासे गाविसको सेरा गाउँमा राहत रामग्री पुर्‍याएर उड्दै गरेको भारतीय हेलिकप्टर

सेनाको सोही बैठकपछि सेनाले सरकारलाई भारतीय हेलिकप्टरको कार्यशैलीबारे विस्तृत जानकारी गराएको थियो । सेनाका एक उच्च अधिकारी भन्छन्– ‘भारतीय सेनाका एमआई १७ हेलिकप्टरहरु हाइ अल्टिच्युटमा जान नमान्ने, राहत सामग्री लिएर जाँदा पनि हेलि ल्यान्ड नगरी चालु अवस्थामै राखेर माथिबाटै चामल तथा राहतका समाग्री भुइँमा फाल्ने गरेको, कतिपय चामलको बोरा छरिएर भुइँभरी पोखिने, राहत वितरण प्रणाली अव्यवस्थित भएका जस्ता कुराहरु रिपोर्ट गरिएको थियो । ल्यान्ड नगरी पंखा चालु अवस्थामै राखेर माथि नै राखिराख्दा इन्धन धेरै खर्च हुने जस्ता समस्या पनि जानकारी गराइएको थियो ।’

सेनाबाट यस्तो रिपोर्ट आएपछि गत २४ गतेदेखि सरकारले भारतीय हेलिकोप्टरलाई इन्धनको रकम दिन छाडेको छ । त्यसअघि सबै इन्धन नेपाल सरकारले ब्यहोर्नुपथ्र्यो । सैनिक अधिकारीका अनुसार भारतीय एमआई–१७ हेलिकप्टरले जम्मा ४०० किलो मात्र चामल बोक्ने गर्छ । जबकी केही दिनअघि मात्र आइपुगेको त्यही मोडलको चिनियाँ हेलिकप्टरले १८०० किलो सामग्री बोक्दै आएको छ ।

त्रिभुवन अन्तर्राष्ट्रिय विमानस्थल र पोखरा विमानस्थलमा भारतीय हेलिकोप्टरले अड्डा जमाएपछि चिनियाँ हेलिकप्टर एक हप्ताअघि मात्र नेपाल आएको हो । भारतीय हेलिकप्टरकै कारण अहिले पनि नेपालको विमानस्थलमा पार्किङ गर्ने स्थान नरहेपछि चिनियाँ हेलिकप्टर दिनभर राहतका काममा सहयोग गरेर राती ‘पार्किङ’का लागि नेपालको सीमाछेउ रहेको उसकै शहर केरुङमा लाने गरेको छ ।

भारतीय हेलिकप्टरबाहेकका अन्यले भने नेपाली सेनासँग समन्वय गरेरै काम गरिरहेको छ । राहत वितरण तथा अन्य कार्यका लागि सघाउन भारतबाहेक अमेरिका र चीनको हेलिकप्टरले पनि सहयोग गरिरहेको छ ।

तस्बिर : नेपालको हिमाली क्षेत्रमा राहत सामग्री ओसार्दै गरेको चिनियाँ हेलिकप्टर (माथि) ।

Source:- esamata