गोर्खालीसँग काम गर्न नपाएकोमा बेलायती राजकुमार दुःखी

बेलायतका राजकुमार ह्यारीले आफ्नो एउटा इच्छा पूरा नभएको खुलासा गरेका छन् । दश वर्षे ब्रिटिस सशस्त्र बलमा सेवा गर्दा गुर्खा रेजिमेन्टमा काम गर्न नपाएकोमा उनले खेद व्यक्त गरेका हुन् ।

हजुरआमा र पितासहित गोरखा भर्तीको २०० वर्षगाँठको अवसरमा लन्डनमा मनाइएको विशेषा समरोहमा सहभागी हुने क्रममा उनले सो कुरा बताएका हुन् ।

उनले भने, ‘म गुर्खासँग हुन चाहन्थें तर कैल्यै मौका मिलेन । म गुर्खाप्रति शिर झुकाउँछु । उनीहरु धन्य हुन् ।’

गुर्खा वेलफेयर ट्रस्टद्वारा आयोजित रिसेप्सन कार्यक्रम रोयल चेल्सिया हस्पिटलमा भएको थियो । कार्यक्रम सुरु हुनुअघि नेपालमा भूकम्पमा परी निधन भएकाहरुको स्मरणमा एक मिनेट मौन धारण गिरएको थियो ।