नेपालको कालो दिन : इराकमा नेपालीको हत्या भएको आज १२ वर्ष पुग्यो

आजकै दिन अर्थात् २०६१ सालको भाद्र १६ गते राजधानी विहानैदेखि तनाबग्रस्त बन्न पुग्यो । राजधानीमा बिहानैदेखि आगजनी र तोडफोडका घटनाहरु भए । विशेषगरी वैदेशिक रोजगारसँग सम्बन्धित म्यानपावर कार्यालय र विदेशी सञ्चालकको मातहतमा सञ्चालन भएका नेपाली कार्यालयहरु तोडफोडमा परे ।

अघिल्लो दिन अर्थात् भाद्र १५ गतेको दिन रोजगारीको सिलसिलामा इराक पुगेका १२ नेपालीको            सुन्नी अतिवादी संगठन इस्लाम अल सुन्नाले घाँटीरेटी निर्ममतापूर्वक हत्या गरेका थिए । क्रुरतापूर्वक नेपालीको विदेशी भूमिमा हत्या भएपछि त्यसको आक्रोशमा उत्रिएका नेपालीहरुले भाद्र १६ गतेका दिन राजधानी लगायत मुलुकका विभिन्न स्थानमा भएका म्यानपावर लगायतका कार्यालयहरुमा तोडफोड र आगजनी गरेका थिए ।

सोही इराक हत्याको विरोधमा उत्रिएका नेपालीहरुले राजधानीमा रहेका म्यानपावरसहित विदेशी एयरलाइन्स र विदेशीले सञ्चालन गरेका कार्यालयहरु समेतमा आगजनी र तोडफोड गरेका थिए । विरोधमा उत्रिएकाहरुले त्यस्ता कार्यलयका सामानहरु सडकमा ल्याएर जलाएका थिए । ठाउँ–ठाउँमा टायर बालेर विरोधकर्ताहरुले नाराबाजी समेत गरेका थिए । नेपालीको निर्ममता पूर्वक हत्या भएको विरोध राजधानीमा भएपनि मृतक परिवार भने भावविह्वलमा डुब्न पुग्यो । १२ नेपालीको हत्याले सम्पूर्ण नेपालीलाई स्तब्ध बनायो । सम्पूर्ण नेपाल र नेपाली नै शोकमा डुबेका थिए, त्यो दिन । आजसम्मै उक्त घटनालाई नेपालीले भुल्न सकेका छैनन् ।

विरोधमा उत्रिएकाहरुले मधेशीमुलकमा नागरिकलाई समेत आफ्नो निशानाको तारो बनाएका थिए । विरोधमै उत्रिएका केही समूहहरु मध्येकाले तत्कालीन स्पेशटाईम दैनिक पत्रिकाको कार्यालय समेतमा तोडफोडगरी कार्यालय ध्वस्त बनाएका थिए । त्यस्तै विरोध जनाउँदै हिडेको एक समूहले कान्तिपुर पब्लिकेशनको कार्यालय समेतमा तोडफोड गरेका थिए भने मुस्लिम समुदायको मस्जिद सम्मलाई विरोधकर्ताले तारो बनाएका थिए ।

इराकमा नेपालीको हत्याकाण्ड र राजधानीमा म्यानपावरमाथी अराजक तरिकाले भएको आक्रमणको आज १२ वर्ष पुरा भएको छ । यस दिनलाई वैदेशिक रोजगार व्यवसायी संघ–संस्थाले कालो दिनका रुपमा मनाउँदै आएका छन् । अवाञ्च्छित तरिकाले म्यानपावरमाथी भएको आक्रमणको विरोधस्वरुप आजको दिन वैदेशिक रोजगार व्यवसायीहरु आफ्ना कार्यालयहरु बन्दगर्दै आएका छन् ।